Skip to content

東.思

請不必傷痛 請不必心酸 請把我默默思念

Category Archives: 音樂

以前會好鍾意睇D乜乜頒獎典禮, 但係由唔知由幾時開始, 我已經放棄了. 原因係造馬造得太明顯了. 但要選十大金曲, 以下呢十首定必榜上有名!

排名不分先後!

Get Over You – 鄧紫棋

曾經係屋企日播夜播, 因為想對某人某事徹底忘記! 最終, 當然做得到!

鋼鐵是怎樣煉成的 – 何韻詩

某程度係我覺得好辛苦, 好想放棄自己的時候, 呢首歌絕對係我首選!

無人之境 – 陳奕迅

無原因, D詞好到! 勁有同感!

罪人 – 李克勤

聽完會令我諗起曾經發生的一段愛情,兩個故事;愛人被愛,三人受罪? 更令我相信我當年唔再做第三者的決定正確!

講男講女- 陳奕迅 /露雲娜

通精D upbeat歌都會引起我注意, 何況多左一個曾經好熟悉的靚聲! 點會係我屋企日播夜播呢?

Water Of Love – 鄭秀文

好氣勢加上SAMMI, 自然成為my favorite之一!

一步一步愛 – 鄭秀文/陳奐仁

夏天的消暑歌曲, 更令我相信真愛係會出現的!

無如果 – Swing

好有回到80/90年代的感覺, 更欣賞詞中的那種就算死也愛著你,二人永不分離感覺!

斗零踭 – 楊千嬅

2010絕對係千嬅回歸強勢的一年, 電影演唱會大賣, 連D歌都唔再boring! 呢首歌, 應該度出不少少女變成女人的心聲!

珊瑚島 – 官恩娜

無得解, 因為係我最down最煩的時候, 呢首歌令我有舒緩的作用!

唔知大家的選擇同我有冇出入呢? Anyway新一年開始, 祝大家事事如意, 身體健康!

廣告

自問, 我真係好少聽新歌! 但關心妍的呢首收錄係佢婚後回歸樂壇的新歌, 的確幾引起我的注意! 睇完個MV可能就會明點解!

大家唔知有冇留意到當佢唱到chorus… 即係以下呢幾句…

未明白麼 在乎什麼 敗在什麼

的時候, 係特別出事! 有D硬耳, 及好似有點走音喎! 既然楊千嬅係錄完回歸華星的第一砲飲酒思源後, 發現疑似走音而重新再錄新版飲酒思源2.0! 那麼關小姐或佢唱片公司會唔會發現到呢個問題, 而又肯重新灌錄一個新版呢? 好讓樂迷聽得舒服D呢? 話晒唱呢類型歌都係關小姐強項呀, 無謂成為佢係樂壇的一個遺憾呀!

諗諗佢呀, 唔該!

繼尋日講過係剛過去的weekend開concert的SK後, 今日又點少得講下同樣係開緊演唱會, 同樣係我最喜愛的女歌手之一的丁太, 楊千嬅呀! 不經不覺, 佢原來已經出到了15年, 雖然我並非由day 1鐘意千嬅, 但呢10多年來, 佢點都有一大堆好歌感動過我! 今日不如又來一個我的千嬅私房歌大公開吧! Let’s Go!

千嬅當年參加95年的新秀入行, 當年選唱的是彭羚的等得太久! 雖然入到最後3強, 但最終敗給Eason! 到96年, 華星為她推出第一隻大碟狼來了, 及後並在各大媒體的頒獎禮中得到新人獎! 還有, 一個有D似Sammi的女生, 唱起再見二丁目上來又咁有板有眼! 這就是我對早期的千嬅的記憶, 以當年的記憶及印像, 真很難想像佢今日會成為我最喜愛的女歌手之一!

開始對千嬅有興趣, 係98年的下學期, 係OA的Accounting課跟坐係旁邊的CT熟絡有關! 全因佢當時已經係一位千嬅die hard fans, 話說有一日佢不斷咁話千嬅隻到此一遊專輯有幾好聽, 有如洗腦! 於是我就同佢講, 既然你講得咁好聽, 咁你咪借比得聽下, 睇下係唔係咁好聽? 第2日, 佢真係拎左比我, 仲叫我好好聽下! 既然人地咁有誠意推介咁咪聽下囉, 一如佢所講, 幾好聽! 絕對唔似其他半紅不黑歌手, 唔知唱緊乜! 我還說我當晚, 我足足聽左呢隻碟10多次, 特別係我不要你愛我!

就係咁, 當佢出左第一隻精選碟體驗入學後, 就即時去買! 自此以後, 我就成為千嬅的fans! 99年佢憑抬起我的頭來唱到街知巷聞, 但我更愛另一首歌! 就係有發生過, 全因歌詞好似形容緊當年似有非有而曾經發生過的感情一樣, 當然很順利成為我的私房歌之一啦!

00年, 她居然打低女神成為當年叱吒女歌手金獎, 那時候真係有D憎佢架! 但見到佢真情流露地上台, 不得不說又真係幾cute! 何況當年佢憑少女的祈禱成為金曲金獎時, 女神好似自已得獎咁興奮, 於是就嬲佢唔落, 仲好接受佢添!

離開華星後, 佢靜左一排! 心想唔會從此係樂壇消失呀? 如果真係咁, 就真係可惜! 但01年加盟新藝寶後, 好歌不斷, 例如唱到前特首夫人都眼泛淚光的假如讓我說下去, 及搞到我上昇星座都係水瓶座的,聽到有所感動的可惜我是水瓶座, 還有深入民心的飛女正傳!

從此, 我係家中就有開始收藏千嬅CD習慣, 甚至04年回流, 佢D碟都跟得一齊回流架! 講開04年, 點可能少得由電影大城小事一首配樂演變出來的小城大事呢? 係電影入面, 呢首歌係出現係一個阿伯回憶過去時候, 當時已經勁喜愛! 到出現左千嬅呢個完整version時, 就係咁日播夜播並且電影情節你腦海不斷重播!

起愛郎來了呢首歌的程度, 係試過一路行山一路諗著! 雖然流行程度不及以上幾首, 不過千嬅在演繹歌詞方面真的很耍家, 係一首深深感動我的作品!

可惜去到黎生時代, 千嬅的歌真係沒乜本事吸引到我了! 反而咁, 就08+09成為TVB的最受歡迎女歌手! 非常奇怪… 但10年, 千嬅年頭又有志明與春嬌的成功和口碑, 新歌又好似有D起死回生, 演唱會又好似幾OK! 有望再次成為最受歡迎女歌手啦! 巧合地, 佢結婚擺酒果晚就係我生日的大喜日子, 某程度上都同丁太幾有緣喎! 係度除左祝你演唱會good show外, 亦希望幸褔快樂, 唱多D好歌比我地!

PS. 其實仍有好多side cut好正, 例如Single, 風釆依然, 快樂與哀愁等等…. (當然都係我的私房歌啦!)

呢個weekend真係多演唱會, 係香港就有丁太的Ladies and Gentlemen, 而尋晚係澳門就有關淑怡. 雖然我都鐘意聽佢D歌, 而且我都想去澳門, 不過計埋船票要成1000元, 又好似唔係好值. 於是就放棄! 但出度20年的她, 的確有唔少歌陪我成長或打動到我的. 不如借著我個blog, 一齊分享下一些我的SK經典吧!

認識關淑怡, 係由婦女新姿開始. 記得當年放學後, 電視送飯係我的指定動作. 而今時今日唱到街知巷聞的難得有情人, 就係當年係婦女新姿中播出之日劇主題曲. 就係咁, 我就知道關淑怡係邊個!

小時候, 阿爸阿媽都會買唔少寶麗金的雜錦唱片, 由於成日都會聽到碟入面的歌, 聽得多而又唔會比我skip的, 戀一世的愛, 離開請關燈等都係陪我長大的好歌, 好自然地成為我的心水經典.

讀小學的時候, 阿媽曾經帶過去唱K, 當年佢除左唱D老餅金曲外, 以下呢首當年熱爆歌曲, 佢都有唱下, 忽然先覺得阿媽都算幾潮喎! (當年) 當然, 此曲都成為陪我長大的經典歌啦!

升上中學後, 什麼真真假假(ie. 假的戀愛及真假情話)係影響最深的歌曲之一, 但都不及佢剷青唱的繾綣星光下!

沒有睇過94年港姐, 都唔知道原來SK的快歌係咁型!

自始就更愛上佢, 會搵一些舊作好似心急, 製造迷夢, 親愛的等一再重溫. 除了舊作, 當然少不了欣賞那年的逝去的傳奇!

95年推出的重唱專輯"EX" Shirley Kwan All Times Favourites係我第一次花錢買佢的唱片, 每首歌都非常的型. 直至今日, 呢隻碟亦都係我百聽不厭的大碟之一! 就好似我從來未聽過鄧麗君的原裝忘記她, 只會覺得將一首舊歌再新arrange得好IN! 但聽過原裝正版之後, 彷彿就好似一個村姑變身成為潮爆的時代女性一樣! 又或者80年代disco味極濃的夢伴, 就好似將wet妹, 從新包裝成為一位入得廚房出得廳堂的女子! 呢張唱片, 彷彿係我重新認識佢一樣!

SK係95年的首個紅館個唱, 都係一個很好的機會讓我有機會更深入的認識她的新舊作! 還記得某年暑假在老家, 重溫失戀演奏家及以下呢首歌, 那歌聲不禁深深地打動我的心靈! 真係每次聽到都會起雞皮!

雖然自從96年退隱, 但唱片公司不斷的為她推出新曲加精選大碟, 就好似為一些喜愛她的歌迷, 係沙漠中找到水源一樣! 直到出來做事, 偶然都會聽返這些舊歌出來聽下! (當然因為時下的新歌, 水準不及以往的好!) 假若SK沒有退隱十多年或者行為飄忽, 相信一定會超過今日的成就. 希望09年的Shirley’s Era後, 佢會繼續唱多D好歌及會有更多機會欣賞到她的演出! 講開Shirley’s Era, 不如就以專輯中一首我很喜歡的歌曲為此日誌寫上句號吧!

正當份份報紙都係度講緊W小姐敗訢, 有婚結不得之時. 我卻想愛沒有情之際, 忽然腦海就不斷重播梅姐的情歸何處. 真係不知何解!

歌詞雖然形容女性比較貼切, 但係某程度上, 都好配合我今日的思想及日後的事業及個人感情的方向! 怪不得, 怪不得我係咁諗起呢首歌啦! 不過, 明知係好難, 會令人氣餒, 但都要繼續努力! 因為我知我係可以的! 為自己加油!

近日係我的音樂播放器中, 得到最高播放率(即我本人本月份最愛的歌曲)就係…

其實每次聽到都會想起你, 可能跟你的背境有關吧!

生得嬌小的她 當初只懂 自卑跟羨慕
偏要自命獨特 抗拒著高踭鞋去增高
還是少女怕未夠量度 著了也徒勞
恐怕不顧儀態 差錯腳步 給世界目睹
雖然我識你的時候, 你已經著高踭鞋, 但我想生得嬌小的妳, 應該試過咁諗過掛!

經過日月練歷 增添一身 女人的味道
豐富內在 淡定自在 便可把鞋著得好
著起幾高的踭 幾花的款 亦可跨大步
憑自信全部駕馭得到
直頭係講緊你啦! I mean 係今時今日的你!

搖曳風騷
沒有路我行不到 沒有事我辦不到
行過大馬路
著起斗零踭大步大步
沿途盛放是最美麗花草
未會任世人擺佈 活到令世人鼓舞 路線任我鋪
著起斗零踭逐步逐步 尋覓到自己心頭所好
人成熟才值得自豪
你依家咪向住呢個方向進發啦! 唔係咩?

當天摔的一交 造就現在 學識怎企好
七吋踭比不起 知性耐性 把人托得高
昂然大步大步踏在自己興建的跑道
懷自信誰亦駕馭得到
成日你都咁有自信, 怪不得我地咁好朋友啦!

搖曳風騷
沒有路我行不到 沒有事我辦不到
路線任我鋪
著起斗零踭逐步逐步 尋覓到自己心頭所好

左右 左右
左右 左右
這樣然後 精神 醒神 心情好
不急不躁
高踭有多高亦屹立不倒
還記得你拗柴都繼續著嗎? 仲要好專業咁面露笑容, 結果咪就係睇左成個月跌打! 屹立不倒係某程度上好似講緊你咁!

搖曳風騷
沒有路我行不到 沒有鞋駕馭不到 自信地舞蹈
著起斗零踭大步大步
昂然踏進下個美麗花都
步法未會學不到 步向大眾來宣佈 路線任我鋪
著起斗零踭逐步逐步 來邁向耀眼的前途
人成熟才值得自豪
知你由依家到我生日前都係為左你的人生路線努力, 所以藉此祝你一帆風順!

講咁耐, 你都應該知道我呢篇文章寫比邊個的? 有空就搵我claim埋你D飯數啦!

假如沒有人在facebook日推夜推, 我都唔會知道係2010有一首經典西歌!   又不得不佩服網民的創意, 將VRF的一首成名作寒冰掌mix埋一齊!  勁!

正當眾人對這位謝金燕的種種作出不少批評之時, 又睇下一位網民對此女子及歌曲的見解!

(1) 其實口音不正本身是很性感的,這也正是舒淇在香港被公認為性感的原因之一.  同意!

(2) 填詞和唱腔突破了廣東話的發音方法,令人覺得很新鮮特別,加上她是台灣人,給人一個充份的理由容讓她口音不正.  同意, 但我接受唔到囉!

(3) 填詞內容本身大膽,但沒過火,其實老母並非粗口,很多香港的電台節目主持人都常把老豆老母連在一起說.  當我第一次聽都以為老母係粗口, 後來才得知係台語!   但為什麼一首歌入面要出現4種語言先?  

(4) 她身高170cm,曾獲選美腿小姐,身形似Kelly,跳舞自然好看. 為什麼曾獲選美腿小姐就似女神先?  強烈反對!

(5) 她的嬌嗲表情和動作,正是男士們心裏一直喜歡和想看的.  無言!

(6) 這首雖然是跳舞快歌,但是舞步簡單而不激烈,令跳和看的人都不感到辛苦.  我只能說MV唔算突出, 但又未去到不堪入目!

(7) 影片剪接有配合節奏,讓畫面每幾秒轉換一次,令人百看不厭。 百看不厭?  No way!  因為睇到我眼都花!  

(8) 她本身已有一個12歲的兒子,作為單親媽媽努力工作,特別令人欣賞佩服.  唱歌絕對正當職業, 所以應該支持! 但別忘記, 我們的耐性和包容係有限的!

既然依家有個嗶嗶嗶X寒冰掌, 即將開演唱會的丁太會唔會排呢隻舞, 再叫丁生上台, 2公婆一齊比個surprise我地班fans呢?  丁太, do-able喎, 諗諗呢!