Skip to content

東.思

請不必傷痛 請不必心酸 請把我默默思念

Category Archives: 經典回憶

繼尋日講過係剛過去的weekend開concert的SK後, 今日又點少得講下同樣係開緊演唱會, 同樣係我最喜愛的女歌手之一的丁太, 楊千嬅呀! 不經不覺, 佢原來已經出到了15年, 雖然我並非由day 1鐘意千嬅, 但呢10多年來, 佢點都有一大堆好歌感動過我! 今日不如又來一個我的千嬅私房歌大公開吧! Let’s Go!

千嬅當年參加95年的新秀入行, 當年選唱的是彭羚的等得太久! 雖然入到最後3強, 但最終敗給Eason! 到96年, 華星為她推出第一隻大碟狼來了, 及後並在各大媒體的頒獎禮中得到新人獎! 還有, 一個有D似Sammi的女生, 唱起再見二丁目上來又咁有板有眼! 這就是我對早期的千嬅的記憶, 以當年的記憶及印像, 真很難想像佢今日會成為我最喜愛的女歌手之一!

開始對千嬅有興趣, 係98年的下學期, 係OA的Accounting課跟坐係旁邊的CT熟絡有關! 全因佢當時已經係一位千嬅die hard fans, 話說有一日佢不斷咁話千嬅隻到此一遊專輯有幾好聽, 有如洗腦! 於是我就同佢講, 既然你講得咁好聽, 咁你咪借比得聽下, 睇下係唔係咁好聽? 第2日, 佢真係拎左比我, 仲叫我好好聽下! 既然人地咁有誠意推介咁咪聽下囉, 一如佢所講, 幾好聽! 絕對唔似其他半紅不黑歌手, 唔知唱緊乜! 我還說我當晚, 我足足聽左呢隻碟10多次, 特別係我不要你愛我!

就係咁, 當佢出左第一隻精選碟體驗入學後, 就即時去買! 自此以後, 我就成為千嬅的fans! 99年佢憑抬起我的頭來唱到街知巷聞, 但我更愛另一首歌! 就係有發生過, 全因歌詞好似形容緊當年似有非有而曾經發生過的感情一樣, 當然很順利成為我的私房歌之一啦!

00年, 她居然打低女神成為當年叱吒女歌手金獎, 那時候真係有D憎佢架! 但見到佢真情流露地上台, 不得不說又真係幾cute! 何況當年佢憑少女的祈禱成為金曲金獎時, 女神好似自已得獎咁興奮, 於是就嬲佢唔落, 仲好接受佢添!

離開華星後, 佢靜左一排! 心想唔會從此係樂壇消失呀? 如果真係咁, 就真係可惜! 但01年加盟新藝寶後, 好歌不斷, 例如唱到前特首夫人都眼泛淚光的假如讓我說下去, 及搞到我上昇星座都係水瓶座的,聽到有所感動的可惜我是水瓶座, 還有深入民心的飛女正傳!

從此, 我係家中就有開始收藏千嬅CD習慣, 甚至04年回流, 佢D碟都跟得一齊回流架! 講開04年, 點可能少得由電影大城小事一首配樂演變出來的小城大事呢? 係電影入面, 呢首歌係出現係一個阿伯回憶過去時候, 當時已經勁喜愛! 到出現左千嬅呢個完整version時, 就係咁日播夜播並且電影情節你腦海不斷重播!

起愛郎來了呢首歌的程度, 係試過一路行山一路諗著! 雖然流行程度不及以上幾首, 不過千嬅在演繹歌詞方面真的很耍家, 係一首深深感動我的作品!

可惜去到黎生時代, 千嬅的歌真係沒乜本事吸引到我了! 反而咁, 就08+09成為TVB的最受歡迎女歌手! 非常奇怪… 但10年, 千嬅年頭又有志明與春嬌的成功和口碑, 新歌又好似有D起死回生, 演唱會又好似幾OK! 有望再次成為最受歡迎女歌手啦! 巧合地, 佢結婚擺酒果晚就係我生日的大喜日子, 某程度上都同丁太幾有緣喎! 係度除左祝你演唱會good show外, 亦希望幸褔快樂, 唱多D好歌比我地!

PS. 其實仍有好多side cut好正, 例如Single, 風釆依然, 快樂與哀愁等等…. (當然都係我的私房歌啦!)

呢個weekend真係多演唱會, 係香港就有丁太的Ladies and Gentlemen, 而尋晚係澳門就有關淑怡. 雖然我都鐘意聽佢D歌, 而且我都想去澳門, 不過計埋船票要成1000元, 又好似唔係好值. 於是就放棄! 但出度20年的她, 的確有唔少歌陪我成長或打動到我的. 不如借著我個blog, 一齊分享下一些我的SK經典吧!

認識關淑怡, 係由婦女新姿開始. 記得當年放學後, 電視送飯係我的指定動作. 而今時今日唱到街知巷聞的難得有情人, 就係當年係婦女新姿中播出之日劇主題曲. 就係咁, 我就知道關淑怡係邊個!

小時候, 阿爸阿媽都會買唔少寶麗金的雜錦唱片, 由於成日都會聽到碟入面的歌, 聽得多而又唔會比我skip的, 戀一世的愛, 離開請關燈等都係陪我長大的好歌, 好自然地成為我的心水經典.

讀小學的時候, 阿媽曾經帶過去唱K, 當年佢除左唱D老餅金曲外, 以下呢首當年熱爆歌曲, 佢都有唱下, 忽然先覺得阿媽都算幾潮喎! (當年) 當然, 此曲都成為陪我長大的經典歌啦!

升上中學後, 什麼真真假假(ie. 假的戀愛及真假情話)係影響最深的歌曲之一, 但都不及佢剷青唱的繾綣星光下!

沒有睇過94年港姐, 都唔知道原來SK的快歌係咁型!

自始就更愛上佢, 會搵一些舊作好似心急, 製造迷夢, 親愛的等一再重溫. 除了舊作, 當然少不了欣賞那年的逝去的傳奇!

95年推出的重唱專輯"EX" Shirley Kwan All Times Favourites係我第一次花錢買佢的唱片, 每首歌都非常的型. 直至今日, 呢隻碟亦都係我百聽不厭的大碟之一! 就好似我從來未聽過鄧麗君的原裝忘記她, 只會覺得將一首舊歌再新arrange得好IN! 但聽過原裝正版之後, 彷彿就好似一個村姑變身成為潮爆的時代女性一樣! 又或者80年代disco味極濃的夢伴, 就好似將wet妹, 從新包裝成為一位入得廚房出得廳堂的女子! 呢張唱片, 彷彿係我重新認識佢一樣!

SK係95年的首個紅館個唱, 都係一個很好的機會讓我有機會更深入的認識她的新舊作! 還記得某年暑假在老家, 重溫失戀演奏家及以下呢首歌, 那歌聲不禁深深地打動我的心靈! 真係每次聽到都會起雞皮!

雖然自從96年退隱, 但唱片公司不斷的為她推出新曲加精選大碟, 就好似為一些喜愛她的歌迷, 係沙漠中找到水源一樣! 直到出來做事, 偶然都會聽返這些舊歌出來聽下! (當然因為時下的新歌, 水準不及以往的好!) 假若SK沒有退隱十多年或者行為飄忽, 相信一定會超過今日的成就. 希望09年的Shirley’s Era後, 佢會繼續唱多D好歌及會有更多機會欣賞到她的演出! 講開Shirley’s Era, 不如就以專輯中一首我很喜歡的歌曲為此日誌寫上句號吧!

正當份份報紙都係度講緊W小姐敗訢, 有婚結不得之時. 我卻想愛沒有情之際, 忽然腦海就不斷重播梅姐的情歸何處. 真係不知何解!

歌詞雖然形容女性比較貼切, 但係某程度上, 都好配合我今日的思想及日後的事業及個人感情的方向! 怪不得, 怪不得我係咁諗起呢首歌啦! 不過, 明知係好難, 會令人氣餒, 但都要繼續努力! 因為我知我係可以的! 為自己加油!

尋日本來冇節目,加上一起身就落大雨,結果除左落街食過小許東西外,就整日留在家中。偶然享受這種安寧,確實有助身心得到徹底的休息;這樣才有十足的心力去面對未來一星期的刺激。但以為平靜的星期天,居然找到一些東西令我想用文字記低!

1. 一早落街就見到一個阿伯係屋企附近的大街,隨處小便!第一反應係,that’s very disgusting! 咁都比我見到,好邪囉!之後就諗平時喺嗰個位有好多差人架喎,點解今日唔見晒架? 到最後我沒有做任何事,只有視而不見!某程度上,我覺得沒有舉報個阿伯係好衰,但就算比我搵到個差人,個阿伯可能都完事兼唔見左。所以只能說我黑仔及提醒自己,就算幾急都好,點都要搵廁所搞掂!於是我喺我部電話到,即時裝返個「衝廁」app以防萬一!

2. 早排喺KK Box download左好多新歌,終於有時間去聽,例如古巨基的時代、Swing的電及莫文蔚的寶貝!聽了以後,覺得三張都係精彩的大碟!特別係莫文蔚的寶貝,的確很適合喺一relaxing Sunday收聽。全碟都係一些easy listening的歌,很舒服、感覺好sweet、好warm同style好歸一,或許遲些再分享下我的寶貝碟評吧!

3. 電視重播一齣咸豐年舊片-重慶森林!即時鈎起一些回憶,話說十多年前的一個暑假,屋企人租左呢隻laser碟返屋企睇,正因為有王菲參與演出,於是就dub左。自始就開始日睇夜睇,睇到所有對白都識背,仲以溝空姐為終生目標添。還有朝偉幫阿菲按摩小腿,並說女人的小腿最迷人一句影響了我!當然我曾經都好似朝偉咁對住屋企d死物講野,激到阿媽死下死下。又因為阿菲的一句對白,你d頭髮好靚喎,留左好耐呀!煩住當年留住長直髮的家姐,煩到佢火都嚟!諗返轉頭,其實都變態,不過一個暑假過後,一切就回復正常!但最奇怪的係,就算我睇左套戲不下過百次,我都係唔明佢想表達些什麼? 到底係我有問題還是什麼呢? 只知道California Dreaming同What a difference a day make好好聽!

4. 返左香港咁耐,通常都係出街食多,全因自己太懶及自己煮完一大餐,就算幾好食都係得自己一個知。忽然間就好掛住以前喺屋企,煮三餸一湯、白飯任裝的日子!例如,焗雞翼、蒜蓉蒸茄子、洋蔥豬扒、麻婆豆付、炆冬菇、螞蟻上樹等,都係當年屋企人比較鍾意食的菜式;見到佢地食得開心,我都會煮得開心。當然我又會想食昌哥的燒雞、焗叉燒,阿媽的足料靚湯、粥品、沙律、pasta、白酒青口;還有夏天係屋企的bbq, 諗起都口水流!係時候真係要認真想一想返屋企走一趟,享受一下跟屋企人一齊的時刻!而且唔少朋友返過多倫多後,都話變左好多,值得返去一轉。不過亦要提醒阿媽,假如我真係返嚟,唔好再好似上次咁,ban我idea喎!其實我可唔可提議來一個family reunion喺Toronto呢?

5. 全晚等咁耐就係等住見證誰是超級巨聲,真係等到頸都長!聽到冠軍林欣彤唱Can you feel the love tonight的時候,又令我諗起N年前在vocal class唱過呢首歌,又令我回想起以前日唱夜唱,為左學校music night, 為分數的日!又因為唱choir識到好多好朋友,令我喺AY的日子特別開心!情況就有少少似巨聲的參賽者一樣,其實就算誰勝誰敗,我都真心佩服所有參賽者的努力和誠意。自問我就冇如此勇氣、堅定、精力去面對每個禮拜的馬拉松歌唱比賽,所以我還是安守本份地做一個觀眾吧!但有一個體會,就係勇氣、勇敢都係要由一些困難、逆境中磨練出來;現階段我不能說我很成功,但我仍然努力學習中!天祐我吧!因我依然相信只要有夢想,凡事可成真!

話咁快就過完一個星期日了,希望未來一個星期會過得比較順利啲啦!:)

20年前有齣戲叫安樂戰場,故事地點都係菲律賓,都係人質被挾持…

【安樂戰場】敘述一群觀光客,到菲律賓旅遊,不幸被當地的菲共挾持,居間發生了屠殺、強暴等惡行,政府單位又因國情問題,遲遲無法下達營救行動,被逼到絕境的觀光客們只能孤軍殺出、死裡逃生… 以為只有在電影才出現的情節,居然係24小時之前活現!

我只想講的是, 對於馬尼拉的慘劇, 除左對那班SWAT (Sorry we aren’t trained)及菲警, 菲政府等表達強烈不滿外… 我不想同意有人存心想殺人滅口, 但今日所看見的許多新聞, 圖片等, 就真的不可不信. 我只能說不一樣的7月14! 係一個不想回憶, 未敢忘記的7月14. 亦對一班壯烈犧牲的英雄, 向你們作出深切的謝意! 但願你們一路好走, 安心上路!

無何否認, 這件事對我們的心靈做成一定程度的痛楚! 期望那個令人發火的政府真的會給我們一個交待, 還有停止你的人民在慘劇現場笑住口影相. 唔該!

自2002年的大碟將愛後, 王菲就一直退隱. 復出傳聞源源不絕, 可惜全部都只聞樓梯響, 不見人下來! 恨聽佢歌, 欣賞佢風采的, 就只能靠聽佢舊唱片, 睇佢以前係演唱會或頒獎禮等… 正當我已不再期待佢會復出之際, 阿菲終於決定舉行復出演唱會, 門票仲要係10分鐘內火速賣光. 彷彿所有樂迷就像活在沙漠而且缺水一般, 她的復出演唱會就像一支1L大水出現在沙漠! 至於這次復出演唱會會否增設香港站, 那就不得而知! 假如真係有香港站, 幾貴都想去睇!

講開王菲, 佢的歌同鄭秀文一樣, 都係見證住我中學的美好時光! 就趁今日係阿菲生日, 分享一下關於佢如何成為我的90回憶!

話說92年暑假的某天, 係電視聽到…

歌中開首那一段的哼唱, 真的令我留下很深的印象! 就是這首歌, 令我係四大天王當到之時, 忽然記得香港的女歌手都不弱架! 當然, 92年紅遍全港的歌絕對唔係這首, 而係容易受傷的女人! 梗係啦, 連我阿媽去唱K都會特登點黎唱, 咁入屋, 當然亦係令佢揚名立萬的經典之作! (雖然我極度討厭, 因為真係好娘!) 自此, 我就開始有小小鐘意左佢!

直到92年尾, 一首帶點Disco味的upbeat歌曲-不再兒嬉就完全地把我的心俘虜!

而收錄此曲的大碟執迷不悔, 就成為我所買的第一盒王菲cassette帶, 亦都係我最欣賞的王菲唱片封套! 當然更係一首我極喜愛的王菲金曲之一!

至於係93年另一首我喜愛的王菲歌曲, 必定係收錄於十萬個為什麼?中的如風, 以前年少只覺得旋律好聽, 但今日就覺得D詞好有意思! 特別係經過無數次我情情塔塔後, 那一句但我不過是人非夢 總有些真笑亦有真痛, 絕對成為我的all time favorite.

94年的暑假, 我要離開香港到多倫多了! 正因為咁, 離港前買了好多中文碟, 當中又怎能缺少首次棄用藝名而用回個人本名及整個封套更找不到一張王菲照片的胡思亂想呢? 個人認為這是一張具實驗味道但又保留了商業完素的專輯, 亦係阿菲一張我最滿/鐘意的廣東碟! 係呢張碟內面, 我最喜愛的偏偏係一首國語歌…

身為鄧麗君fans的她, 係95年推出了一張翻唱鄧的菲靡靡之音! 而以下呢首歌同埋黃昏裡就成為那年暑假在我家中熱播的歌曲! 其實此專輯, 令我由另一個各度去認識鄧麗君! 亦令我明白編曲就如化粧一樣, 可以讓村姑變索女!

96年係第一次返香港過暑假, 仲記得落機第一件事係走去買浮躁大碟! 雖然全碟歌曲未別受到主流的完全接納, 但迷幻自由又頹廢的感覺, 以當時的十來歲的我, 真係覺得好潮! 還記得以下呢首歌嗎? 全曲只有22個字的歌詞, 絕對係當年的話題之作啦!

過檔到EMI後的同名大碟雖未有為我帶來太多驚喜, 但98年的唱遊實在係一隻我最喜愛的王菲大碟! 那種活潑, 無拘無束及多完化的唱腔, 令我有一種重頭認識阿菲之感! 仲記得當時情誡一曲派上台, 我已愛上! 一日聽過百次以上, 濕濕碎啦!

只愛陌生人係我入U之前最後買的一張大碟, 亦係入U之後; 不論係車, 臨考試溫書之時都係聽呢隻來relax自已的大碟! 此專輯雖然係阿菲離婚後的第一張大碟, 但碟內不難找到不少上佳之作! 最愛的不是只愛陌生人郵差, 而係一首沒有派台的推翻. 當中就這樣你也探都不探 看也不看 像與你無關 像是只有的能可以承受這無解的遺憾, 真的教我感觸/感慨, 更令我明白阿媽係當年的感受多一點吧!

真想不到由一個哼唱開始留意佢, 愛上佢…甚至由佢的歌當中, 得到無限的覺悟及感慨! 無可否認, 佢都係一個見證我心靈成長的重要部份之一! 多謝阿菲, 及祝你生日快樂, 演唱會成功!

時光飛逝,一個月前從facebook得知學妹何小姐結婚後,尋晚就已經係擺酒之日。能夠有幸出席見證佢步向人生另一階段,實屬我的榮幸。首先係度再次恭喜你正式告別單身,及婚後生活愉快、早日有喜。得閒多d約出嚟食飯啦!

原以為佢唔會請其他小學同學之際,突然見到一對熟悉面孔的孖女。多年不見,她們居然認得我,真係安慰!而更意想不到的是,新娘子能請到我們的小學老師,陳老師出現!對我來講真係一個驚喜,她是一位在我小六時的音樂老師,更想不到佢仲記得我。想不到出席婚宴都能跟小學老師及同學聚舊,真係好開心。再一次多謝何小姐,ops… 應該係支太的邀請,讓我過了一個幸福溫馨的週日晚上!

一班舊生跟老師係席間分享了許多東西,包括我們每位同學原來有一張學藉咭,咭上有很多值得我們紀念的東西。例如在小學期間的中英數各科成績及名次,可惜自小學榮休後,想keep都唔可以了,因為這些東西已成政府財產了!多多錢都未別買得返… 小學時候的東西,真係值得懷念哦! 但願我們的小學校友能有多點聚會,讓我能懷緬過去無憂無累的快樂日子!

席間陳老師問左兩個估你唔到的問題,包括我結左婚未? 同埋有冇拍拖?呢d通常都係一些親戚會問的問題,當然我沒有需要隱瞞真相,亦坦白地如實報導!但當我說:「我剛回復單身!」席上的張學兄居然替我舉杯道賀,心中滿是問號。難道單身真的值得高興嗎? 原來是替我的解脫而高興,咁又係! 人生有幾多個十年先,與其花時間在一個令我傷心或不是我要找的人生過客,倒不如揮慧劍,珍惜時間繼續尋找我的另一半吧? 何況我都幾享受being single的日子,有時寂寞都幾開心呀!

講開談戀愛,陳老師又跟我們分享了一個發生係小學校舍的故事,聽完真係令我震驚!事原離開母校的一年,有一位無心向學的男學生,買了一束大紮鮮花在操場中心向心儀的女同學示愛,到最後亦因為犯十一受了法律的呈戒。聽完之後,我只能說我很幸運我沒有因為父母離異而學壞。亦令我想起早前我寫的一席話,如果一個年代可以培養左唔同的小朋友出黎, 那麼我又是否應該計劃下, 我想培養出怎麼樣的下一代呢?

真想不到一個婚宴, 會令我有無限的喜悅、溫馨、回憶及反思! 再次多謝支太及一眾校友, 我們繼續保持聯絡, 唔好失蹤!