Skip to content

東.思

請不必傷痛 請不必心酸 請把我默默思念

Category Archives: 其他

跟友人食飯時,佢趁我食野途中,替我做了一個卡通樣!當佢send左個完成品後,我即時笑到七個一皮!點解?睇完咪知囉!

因為我點解無啦啦同陳奐仁咁似呀?仲可以咁可愛?真係多謝R生咁有同情心,將我呢個醜男變成個cutie呀!

廣告

對於一個不屬於美容界,但被邀請出席香港國際美容師協會的雙週年晚會,本人實屬榮幸。能夠被邀出席,都係多得郭姐!除左因為佢係該會的主席(仲要係最後一次以主席身份喎!),更因為佢係該晚會的司儀。身為好友,點都要支持下啦!

機本上, 呢個晚會同一般婚宴一樣! 睇菜單就知啦!

當晚除左係一個bi-annual dinner外, 亦係一個就職活動. 講真, 唔係業內人仕的我真係提不起一點興趣, 所以對於演講者的幾分鐘speech真的毫無印象. 唯一記得的就係第一位致詞嘉賓係一位前亞姐, 好似同葉玉卿同屆的潘先儀! 係又未開席及聆聽各位的演詞之際, 我除左拍掌外, 玩我部I Phone就係唯一方法令我無咁悶的方法! 席間的白姐妹就介紹我玩一個新Apps, Restaurant Story. 雖然白姐妹只係大概咁話比我聽個game係點玩, 但我未有花大多心力去玩, 因為係whatsapp入面係咁有人同我chat! 所以, 遲下我先慢慢玩!

那些儀式大致完成後, 都未可以開席喎, 因為司儀話會即時進行抽table gift的環節! 檯上一共有7份禮物由12個人一齊抽, 我又係無乜expectation底下 (唔多唔少都因為我冇抽獎命!), 居然中左獎喎! 就係…

大家估到這是什麼嗎? 去得同美容有關的晚宴, 當然份禮物係同扮靚有關啦! 答案就係一支生眉液! 我第一個反應係有乜用架? 同埋用完對眉會唔會變到苦榮咁粗架? 不過, 無所謂啦! 都係一種luck! 或者去到大抽獎時, 可能會打破冇抽獎運的宿命呢! 當然, 到最後都係乜都抽唔到啦!

抽完table gift, 終於有得食! 食食下就有一D表演睇下, 包括唱歌跳舞! 氣氛亦係郭姐的帶動底下先冇咁悶! 但係我有個疑問, 明明有2個MC, 而郭姐又事先同我講佢會少D出聲架? 點解成晚佢個partner除左開頭出過聲外, 其餘時間好像隱形咁(口既)! 莫非佢一杯即醉? 但不得不讚下我位老友, 造型扮相美麗外, 做司儀都幾有台形喎! 唔知第日我結婚, 搵佢做MC會唔會托我手爭呢?

到散場先搵到佢同我影張合照! 真係辛苦你啦! Anyway, 個party又玩得幾開心呀! 有得食, 又有禮物收, 仲可以比機會自己著下靚衫! 一次過滿足3個願望, 仲開心過食Kinder 出奇蛋! 所以郭姐你唔好咁客氣啦, 其實係我多謝你先真!

尋日本來冇節目,加上一起身就落大雨,結果除左落街食過小許東西外,就整日留在家中。偶然享受這種安寧,確實有助身心得到徹底的休息;這樣才有十足的心力去面對未來一星期的刺激。但以為平靜的星期天,居然找到一些東西令我想用文字記低!

1. 一早落街就見到一個阿伯係屋企附近的大街,隨處小便!第一反應係,that’s very disgusting! 咁都比我見到,好邪囉!之後就諗平時喺嗰個位有好多差人架喎,點解今日唔見晒架? 到最後我沒有做任何事,只有視而不見!某程度上,我覺得沒有舉報個阿伯係好衰,但就算比我搵到個差人,個阿伯可能都完事兼唔見左。所以只能說我黑仔及提醒自己,就算幾急都好,點都要搵廁所搞掂!於是我喺我部電話到,即時裝返個「衝廁」app以防萬一!

2. 早排喺KK Box download左好多新歌,終於有時間去聽,例如古巨基的時代、Swing的電及莫文蔚的寶貝!聽了以後,覺得三張都係精彩的大碟!特別係莫文蔚的寶貝,的確很適合喺一relaxing Sunday收聽。全碟都係一些easy listening的歌,很舒服、感覺好sweet、好warm同style好歸一,或許遲些再分享下我的寶貝碟評吧!

3. 電視重播一齣咸豐年舊片-重慶森林!即時鈎起一些回憶,話說十多年前的一個暑假,屋企人租左呢隻laser碟返屋企睇,正因為有王菲參與演出,於是就dub左。自始就開始日睇夜睇,睇到所有對白都識背,仲以溝空姐為終生目標添。還有朝偉幫阿菲按摩小腿,並說女人的小腿最迷人一句影響了我!當然我曾經都好似朝偉咁對住屋企d死物講野,激到阿媽死下死下。又因為阿菲的一句對白,你d頭髮好靚喎,留左好耐呀!煩住當年留住長直髮的家姐,煩到佢火都嚟!諗返轉頭,其實都變態,不過一個暑假過後,一切就回復正常!但最奇怪的係,就算我睇左套戲不下過百次,我都係唔明佢想表達些什麼? 到底係我有問題還是什麼呢? 只知道California Dreaming同What a difference a day make好好聽!

4. 返左香港咁耐,通常都係出街食多,全因自己太懶及自己煮完一大餐,就算幾好食都係得自己一個知。忽然間就好掛住以前喺屋企,煮三餸一湯、白飯任裝的日子!例如,焗雞翼、蒜蓉蒸茄子、洋蔥豬扒、麻婆豆付、炆冬菇、螞蟻上樹等,都係當年屋企人比較鍾意食的菜式;見到佢地食得開心,我都會煮得開心。當然我又會想食昌哥的燒雞、焗叉燒,阿媽的足料靚湯、粥品、沙律、pasta、白酒青口;還有夏天係屋企的bbq, 諗起都口水流!係時候真係要認真想一想返屋企走一趟,享受一下跟屋企人一齊的時刻!而且唔少朋友返過多倫多後,都話變左好多,值得返去一轉。不過亦要提醒阿媽,假如我真係返嚟,唔好再好似上次咁,ban我idea喎!其實我可唔可提議來一個family reunion喺Toronto呢?

5. 全晚等咁耐就係等住見證誰是超級巨聲,真係等到頸都長!聽到冠軍林欣彤唱Can you feel the love tonight的時候,又令我諗起N年前在vocal class唱過呢首歌,又令我回想起以前日唱夜唱,為左學校music night, 為分數的日!又因為唱choir識到好多好朋友,令我喺AY的日子特別開心!情況就有少少似巨聲的參賽者一樣,其實就算誰勝誰敗,我都真心佩服所有參賽者的努力和誠意。自問我就冇如此勇氣、堅定、精力去面對每個禮拜的馬拉松歌唱比賽,所以我還是安守本份地做一個觀眾吧!但有一個體會,就係勇氣、勇敢都係要由一些困難、逆境中磨練出來;現階段我不能說我很成功,但我仍然努力學習中!天祐我吧!因我依然相信只要有夢想,凡事可成真!

話咁快就過完一個星期日了,希望未來一個星期會過得比較順利啲啦!:)

自從馬尼拉人質慘劇後,我日日都facebook, 寫blog及上網睇新聞。結果睇得太多,令我心情久久未能平復。於是我決定暫別以上活動幾日,雖然係悶得令我發瘋,但我的心情已經好返好多了!加上有機會跟身邊的家人好友分享自己的感想、感受,更在昨日以自己的腳步及汗水來哀悼遇難同胞;情緒得到正確的發泄後,我相信我可以重新出發面對一切!但願亡魂得到安息、各傷者早日康復、倖存者能勇敢面對以後的生活!最重要的是真相能得以查明、正義得以彰顯!

香港人,加油啊!

給各位關心我的朋友,

即使我現在心裏多麼的忐忑不安, 情緒多麼的動盪上落! 我不得不承認, 我經已接受了爸爸患上重病的消息! 因為如果上天要他歸隊, 就算任何人有多麼捨不得, 我們都應要放手!

大家請放心, 我心情已經慢慢平復! 明早訓醒, 我會繼續我應該要做的事! 亦會堅強及勇敢的面對以後一切的事! 請各位無需擔心, I will be fine!

感激各位係咁多年以來, 比我無限的支持和愛, 令我有能力去面對一切的風風雨雨! 我會加油努力!

東字! 🙂

唔知點解大口仔同世界盃咁有緣? 2006年7仔就推出波衫鎮匙扣, 到2010就出左世界明星隊公仔鎮匙扣! 真係巧合!

Anyway, 呢15隻公仔已經到達我屋企啦! 當然, 要儲齊就一定要搵friend幫手, 所以多謝各位有份幫我完成心願的朋友!

今次之後我更肯定的知道, 阿媽成日話我依然係一個大唔透的細路原來係好真架! 試問一個30歲的大人, 仲會打機, 儲公仔, 買Paul Frank等等… 但係係呢個時代, 有邊個唔係kidult先? 😛

正當人人係度講談情說案抄襲神探伽俐略, 連日本人都聲討緊tbb的時候, 此劇收視依然爆燈! 雖然我冇乜主動地關注呢齣劇, 不過正因為無意中收看, 我先發現現實中的我有多笨!

劇情發展到楊怡勁冧"阿太最受歡迎男歌手", 女為了討好男, 佢親自下廚煮左餐蛋麵比個男人食. 而大家唔會太在意此情節時, 我先醒起平時我去新X記最興叫的餐蛋飯, 係好易整的. 易到只要煲下飯, 開隻鑊煎下就得, 而且仲化算好多添.

假設以一包五公斤的米賣50元, 平均可以用100餐左右(以我一個人的食量計). 即係用左50仙係米飯上. 我本人愛食雙蛋, 蛋係街市都係賣一蚊隻, 咁即係用左2蚊. 至於午餐肉一罐都係20元左右, 假設一罐可以切到十塊而一碟飯我會食二塊, 餐肉的成本就係4蚊. 那麼成餐飯都係用左6個半, 就算計埋燈油火蠟, 十蚊應該都夠埋單啦, 係咪先? 咁我點解仲心甘情願地比多4倍價錢去X釗記吃呢碟飯呢?

仲有喎, 如果自己煮的話, 飯又可以自己調節軟硬度, 我又可以自己煎到自己鍾意的燶邊蛋及香脆的午餐肉喎! 而且成餐都可以冇咁油膩(雖然都唔係好健康架啦)! 咁我點解我仲咁蠢出去食, 仲要唔係自己心中所想的餐蛋飯呢?

係囉, 我怎麼會這麼笨呢?